Skip to Content

Unha mañá de poesía improvisada no Morrazo

O primeiro certame de Regueifas da comarca implicou a 400 alumnos de 2º da ESO de todos os colexios e institutos que imparten Secundaria en Bueu, Cangas e Moaña. Tras un mes de obradoiros e poesía improvisada en cada centro, os 100 mellores competiron entre eles onte no Auditorio cangués. O xurado, composto por persoeiros da música tradicional local, determinou que o instituto As Barxas gañase o rosco de pan por contar con máis finalistas que ninguén. Sen embargo, os catro estudantes que chegaron á última quenda foron alumnos da Paralaia, María Soliño, Pondal e Compañía de María.

Un cento de alumnos de 2º da ESO de todos os centros escolares da comarca foron seleccionados para competir ao longo da mañá de onte representando aos seus colexios e institutos no marco do primeiro Certame de Poesía Improvisada, onde amosaron axilidade mental para facer regueifas baixo certas condicións que propoñían os directores do evento: Pinto d´Herbón e Luís Caruncho. Tras un mes de obradoiros e fases previas en cada un dos centros, onte se disputaban as roldas finais, que arrincaron con 10 quendas de 10 alumnos cada unha. Os 20 mellores foron seleccionados para a penúltima quenda, onde se estipulou que o instituto As Barxas de Moaña resultou gañador ao ser o que meteu máis alumnos entre os 20 mellores.

O xurado encargouse finalmente de seleccionar aos catro mellores regueifeiros da comarca, que se enfrontaron nunha quenda final xa sen carácter competitivo. Os alumnos máis áxiles á hora de improvisar poesía foron Ana Piñeiro do colexio Eduardo Pondal; André Vázquez do IES A Paralaia; Pablo Cordeiro do IES María Soliño; e Adrián Pastoriza do colexio Compañía de María. Entre os aplausos dun público integrado polos 400 participantes nas roldas previas e polos seus profesores, as batallas dialécticas finais deron lugar a poemas que implicaban unha grande axilidade mental. Nalgunas probas os directores obrigaban a enlazar varias palabras, noutras daban o primeiro verso e noutras o cuarto e último. "700 refuxiados/nunha pequena baliza/este mundo é unha merda/non soporto as inxustizas", foi unha das coplas máis aplaudidas, de André Vázquez. "Non me gustan as pelexas/nin tampouco as palizas/ quero cambiar este mundo/non soporto as inxustizas", compuxo o alumno de Cangas Nicolás García na mesma proba, na que o final estaba fixado previamente.

Xurado

O xurado estaba integrado por catro persoeiros recoñecidos do mundo da música tradicional no Morrazo: O mestre gaiteiro Xavier Blanco, Guillerme Ignacio, Pili Gonçalves e Sara Malvido, da Banda de Gaitas Tromentelo. O instituto gañador levou de premio unha rosca de pan, mentres que os 20 alumnos que chegaron ás últimas quendas foron agasallados cunha palmeira de chocolate.

O certame, que partiu da colaboración das concellerías de Normalización Lingüística de Bueu, Cangas e Moaña, buscou mellorar a axilidade mental e o desenvolvemento dos alumnos en galego dun xeito natural, así como vincular a lingua propia de Galicia ao lecer. Os organizadores xa pensan en repetir a experiencia o vindeiro ano.

Para ver fotografías e vídeos, segue a ligazón:
http://www.farodevigo.es/portada-o-morrazo/2017/05/04/unha-mana-poesia-i...