O Regueifa Tour chega a Vila de Cruzes o 13 de dezembro

O festival da regueifa adolescente "Regueifa Tour” chega a Vila de Cruzes na sua segunda gira, que começou en outubro em Redondela e continuará por diferentes vilas e cidades da Galiza. O espetáculo, que se celebrará no Auditório Xosé Casal o vindeiro 13 de dezembro, às 18.30, contém desde música e regueifa tradicional até improvisaçom sobre bases eletrónicas, jogos de humor, e temas vinculados aos movimentos sociais.

Em Vila de Cruzes o festival reunirá as regueifeiras locais, do IES Marco do Camballón, instituto que conta com umha matéria optativa de “Regueifa e improvisaçom oral em verso”, com regueifeiras de Santiago de Compostela e o Courel.

O acto, apresentado polas repentistas Nuria Penas e Lorena Medela, conta com a participaçom dos grupos de música tradicional Vainela e Punteirolo que interpretarám umha peça icónica da música tradicional, a cantiga “Umha pera, duas peras”, recolhida em Sabrexo pola musicóloga Dorothe Schubart em 1980. Dous alunos do Camballón apresentarám umha versom techno desta peça, sobre a que se improvisará em verso.

Outro momento especial no Regueifa Tour será a participaçom do grupo “As Estraloqueiras”, um grupo conformado por integrantes da Banda Artística de Merza, alunas e exalunas do Marco do Camballón, que fam música “tradi-moderna”.

Também se apresentará no Regueifa Tour outra sorpresa: umha regueifa-rave, umha base eletrónica para regueifar, criada polo projeto Luama Son Sistema. O artista, Sam Dharma, afincado em Ferreirós, está colaborando com o alunado do Marco do Camballón num projeto sobre a relaçom entre a música de raíz e o música techno.

Finalmente, também se estreará um audiovisual elaborado polo Projeto Matrix do Clube da Língua do Camballón, “Historia dunha palabra”, que contará a relaçom entre o árabe e o galego, desde o século VIII ao XXI, a partir da palavra de origem norteafricana “rgheif”, adaptada para o galego como “regueifa”. O vídeo está protagonizado polas alumnas Nihal Neggaz e Wiame Taoufiq.

O objetivo do Regueifa Tour é criar festivais onde se reunam adolescentes arredor da poesia oral improvisada e tecer umha rede de adolescentes com a regueifa e o ativismo em defensa da língua galega como nexos de uniom. Na primeira ediçom do “Regueifa Tour” o festival visitou o Courel, Vilalba, Viana do Bolo, Moanha, Santiago de Compostela, o País Basco e Catalunha.

Vila de Cruzes configurou-se nos últimos anos como um dos focos de revitalizaçom da improvisaçom oral em verso e da actualizaçom da tradiçom oral vinculada a movimentos de modernizaçom da nossa língua entre a adolescência.

De ser un género em perigo de extinçom, com apenas sete regueifeiros em 2015, atualmente a regueifa é umha modalidade praticada por centos de rapazas e rapaces de toda a Galiza graças a um processo de participaçom coletiva impulsada desde diferentes associaçons e coletivos. Mais de cem alunos e alunas cursarom a matéria de “Regueifa e Improvisaçom Oral em Verso” no Camballón e no vindeiro 2025 o Projeto Regueifesta, impulsado desde o Camballón, junto ao instituto de Baio e o Milhadoiro, celebrará o seu décimo aniversário.

A regueifa é umha ferramenta útil, divertida, crítica e transformadora para a normalizaçom da língua oral entre a infância e a mocidade.